సెట్స్ పైకి విక్రమ్ కొత్త సినిమా.. షూటింగ్ షురూ!

విలక్షణ నటుడు విక్రమ్ అభిమానులకు శుభవార్త. ఆయన కథానాయకుడిగా, దర్శకుడు ఆనంద్ శంకర్ తెరకెక్కిస్తున్న యాక్షన్ ఎంటర్‌టైనర్ చిత్రీకరణ మంగళవారం అధికారికంగా ప్రారంభమైంది. తాత్కాలికంగా 'చియాన్ 63' అనే వర్కింగ్ టైటిల్‌తో రూపొందుతున్న ఈ సినిమా షూటింగ్ మొదలైనట్లు నిర్మాణ సంస్థ సత్యజ్యోతి ఫిలింస్ సోషల్ మీడియా ద్వారా ప్రకటించింది.

"చియాన్ 63 రోలింగ్.. పవర్, ప్యాషన్‌తో మొదలైంది. చియాన్ సర్‌తో కుకింగ్ మొదలైంది" అంటూ తమ ఎక్స్ ఖాతాలో పోస్ట్ చేసింది. ఈ సినిమాను సెందిల్ త్యాగరాజన్, అర్జున్ త్యాగరాజన్ నిర్మిస్తున్నారు. ఇటీవలే ఈ చిత్రంలో నటి రియా షిబు కూడా భాగమైనట్లు మేకర్స్ వెల్లడించారు.
గతంలో విక్రమ్ పుట్టినరోజు సందర్భంగా ఈ సినిమాను ప్రకటిస్తూ 'ఫస్ట్ ఫ్లేమ్' పేరుతో ఓ వీడియోను విడుదల చేశారు. ఈ వీడియో ప్రకారం, విక్రమ్ ఈ చిత్రంలో ఒక డేంజరస్ కుక్ పాత్రలో కనిపించనున్నారు. "లోపల ఉన్నది కేవలం ఒక వంటవాడు. కానీ అతడిని తక్కువ అంచనా వేయొద్దు" అనే డైలాగ్స్ ఆసక్తిని రేకెత్తించాయి.

ఈ చిత్రానికి సంతోష్ నారాయణన్ సంగీతం అందిస్తుండగా, ఆర్‌డీ రాజశేఖర్ సినిమాటోగ్రఫీ బాధ్యతలు నిర్వర్తిస్తున్నారు. తాను ఎంతో ఆరాధించే నలుగురు దర్శకులతో సినిమాలు చేయనున్నట్లు విక్రమ్ ఈ ఏడాది ఫిబ్రవరిలో ప్రకటించిన విషయం తెలిసిందే. ఆనంద్ శంకర్‌తో చేస్తున్న ఈ ప్రాజెక్ట్ ఆ నాలుగు సినిమాల్లో ఒకటి కావడం విశేషం.